Takim virtual me Kryetarin e Odës së Stomatologëve të Stambollit

Sot, me ftesën e kryetarit të Odës së Stomatologëve të Stambollit, Prof. Dr. Sedat Küçükay, mbajtëm një takim virtual për të krijuar partneritet ndërmjet dy institucioneve tona.

Kryetari i OSK-së Prof. Dr. Blerim Kamberi, shprehu mirënjohje të thellë për mbështetjen e vazhdueshme që komuniteti akademik dhe profesional turk u ka dhënë kolegëve kosovarë. Ai theksoi rëndësinë e thellimit të bashkëpunimit dhe shprehu vendosmërinë për ta zhvilluar partneritetin dypalësh përmes një game të gjerë aktivitetesh profesionale, akademike, hulumtuese, trajnuese e shkencore—duke përfshirë organizimin e konferencave të përbashkëta, shkëmbimin e stafit, projekte kërkimore të përbashkëta, botime shkencore dhe iniciativa të tjera, që do të forcojnë ndjeshëm lidhjet mes dy institucioneve.

Nga ana tjetër, Prof. Dr. Sedat Küçükay theksoi gatishmërinë e plotë të Odës së Stomatologëve të Stambollit për një bashkëpunim gjithëpërfshirës, të mirëstrukturuar dhe afatgjatë. Në këtë kontekst, ai shprehu besimin se strukturimi i qartë i këtij bashkëpunimi do të krijojë vlera të qëndrueshme për të dy komunitetet tona.